السلام عليكم

ابغي اسال عن الدكاترة اللي يدرسون الهندسة المدنية من اول كوس الى اخر كورس اذا قدرتون
بس الحين اهم شي اعرف اول كورس

لانه عندي هالمواد :

كيم101 (صخير)
فيز101 (صخير)
انج101 (المدينة)
كالكولاس1(المدينة)
100CSC(المدينة)

و ابغي اسال عن جمعية كلية الهندسة
متى يقدر الواحد ينظم اليها ؟ بعد كورس او كورسين او من اول كورس ؟


و اكون لكم من الشاكرين

اختكم
الكلمة المنسية

وعليكم السلام ورحمة الله وبركاته ،،


من الحين تبغين تعرفين الدكاتره لاخر كورس ..

بالنسبة الى دكاترة قسم الهندسة المدنيه .. بصراحه ما عندي فكرة عنهم ..

لكن بخصوص المواد اله ذكرتينهم ... اعرف بعضهم ممتازين . ويجوز بعد فيه اسماء جديده من الدكاتره الزينين ..


كيم : انصحكم بالدكتورة ( ريمه ) ... هندية صيري وياها زينه .. وكله روحي اسئليها .. بعدين تساعدش في الامتحان اذا احتجتي لشي ... والـ A مضمونه وياها اذا اشتغلتي وتابعتي شرح الدكتورة .


فيز : الدكتور عقيل الدخيل .. عراقي ... جدا ممتاز .. درسني مقرر فيز 2 ... وايضا هو يدرس فيز 1 .. شرحه ممتاز ..


انج : درستني رئيسة القسم ( newbary ) .. زينه .. لكن تحب الواحد اله دائما يشتغل معاها ..


كاكولاس : الدكتور فيصل الشويخ .. سلمان عباس .. عزيز لحجي ... جيدين ..

csc : ما عندي فكرة عنهم .. بس ما انصحش بالدكتور ماجد فهمي ... كلش ما يفهم شي !! لأنه درسني


بالنسبة الى كلية الهندسه ... اعتقد هناك شروط للانضمام اليها .. وهو تخلصين على ما اعتقد 24 ساعه ! يجوز !! ويكون المعدل 2 وأكثر ..


اتمنى من الطلبة الجدد يفيدونش اكثر مني ...

وبالتوفيق ..

مشكور اخوي و ما تقصر

بس الظاهر انه كسرت اياديك عالفاضي

لاني عطيت وحده حتى الاوقات طلعت ليي الدكاترة و ما ادري بعد اذا هم لو لا بس بسالك عنهم

(ثريا جمعة)


و ابغي اعرف اذا اي لو لا و اسال عنهم

عالعموم مشكور اخوي ((نصير الطلبة)) كما يقولون >>>> و هو كما يقولون قول و فعل

و اذا قدرت تسال لنا عنهم

اني حطيت الموضوع على امل انه اهل التخصص يدشون على الاقل يطلون على الموضوع و يقولون ليي لكن لا حياة لمن تنادي

و اتمنى الرد

الكلمة المنسية

السلام عليكم ..



رضا بنائي
صاحب المقوله الشهيرة (( الفيزيا موب فِتاوي )) .. والله يساعدكم




سمعت عنه من قبل يقولون زين



زينة ..
كلّه تجيب ملخصات .. يعني ما تكتبون الا قليل .. وشرحها بعد زين

السلام عليكم ..


ثريا جمعة .. ممتازة ..



رضا بنائي .. لا رأي يعلو على رأي اخونه حسن مشيمع

مشكور خوك على الرد

اني كنت خايفة منها دي اخر وحدة خفت تقولون عنها مو زينة بروحي متزوبقة من المادة
و الفيز عجل رحنا وطي و خصوصا اني في الصف كنت انام في حصة الفيزيا >>>> اقول فلحنا (عجل في الجامعة شنو بسوي)

مشكور

و انتظر الباقي

عفوا أختي ولا شكر على واجب ..


- الدكتور رضا البنائي .. ما درسني ... لكن هناك من درسهم .. بصراحه ما يمدحونه ... فما اقدر احكم عليه .

- الكيمياء شكله للحين ما تحدد اليكم .. بس ان شاء الله تطلع اليكم الدكتوره ريمه ... وحاولي اذا يصير تبدلين ... مع ان اول فصل ما يقبلون التبديل ..

- حسن كمال ... اي سمعت عنه هو زين ..

- الانج ... هناك من يمدحه .

- كاكولاس ... ثريا جمعه درستني بس في مقرر ثاني .. وكانت جيده .



لكن يا اختي مهما يكون .. المسؤولية الاكبر تقع عليكم ... سووا اله عليكم .. وبالتأكيد الله راح يوفقكم

السلام عليكم

صباح الخير >>>>> ادري بتقولون من وين الصباح و الحين ضحى

مشكور اخوي علي توني شايفة ردك

اخوي حزب الله
الله يعيننا على المحاضرات لانه بتكون على الاقل 3 ساعات ورا بعض اذا كيم او فيز بينتفخ راسي
يعني هو عموما الدكاترة زينين شكلهم بس العلوم ما يندرى هذا اللي بفلح فيه عدل

و اني حاطة هالشي في بالي اخوي حتى امس في يوم التهيئة قالو لنا انهم بس بيعطوننا رؤوس اقلام و احنا علينا الباقي
و ان شاء الله نكون قد المسؤوليه

و بالتوفيق للكل ان شاء الله

اختكم
الكلمة المنسية

وعليكم السلام ورحمة الله وبركاته ،،

مساء النوور أختي ...

الله يوفقكم ... وراح تتعودون بعدين باجواء الجامعه ...

واذا واجهتكم مشكله في الفيزياء .. تستطيعين بالتأكيد الحضور كمستمعه في سكشن ثاني .. اذا ما كان يشكل عليكم اي صعوبه ..

بالطبع الحياة الجامعية تختلف عن المدرسه ... وراح تلاحظون هالشي بأنفسكم ..


بالتوفيق ..

السلام عليكم ..

طق طق طق .. ممكن أدخل ؟؟!

ذكرتيني بالأيام الخوالي خيو الكلمة المنسيه ..

أحب بس اعلق على شغله بسيطه .. اني درستني دكتوره ثريا جمعه .. وهي جدا ممتازه ..

اسلوب تدريسها كأن مال مدارس .. يعني مثل ما قالوا الاخوان تعطي تلخيصات .. تهتم بالتدريس والطلبه .. واذا شافت منش اهتمام بتعطيش ال A .. بالإضافه إلى انها طيبة القلب ..

بالنسبه لبقية الدكاتره فالأخوان ما قصروا ..

ومثل ما قال الاخ حزب الله .. بأن الحياه الجامعيه تختلف عن الحياه المدرسيه اللي تعودنا عليها 12 سنه .. لذلك عزيزتي ..

حاولي من البدايه ان تضعي اسس معينه تمشين عليها في حياتك الجامعيه .. وتكون هذه الاسس هي التي تساعدك على تخطي هذه ال 5 سنوات التي ستحدد مستقبلك كاملا ..
واذا تحتاجين اي مساعده .. فالجميع حاضر لك ..

دمت بكل خير

اختك .. احساس

السلام عليكم

الصراحة ما ادري شنو اقول (مشكورين على هالردود) بصراحة حببتوني اني ادش الجامعة بنفسية اكثر من قبل
و مشكورين على النصايح و ماتقصرون ونردها لكم في الافراح ان شاء الله

مشكورة خيوو احساس و ان شاءالله احصل الـA الله يسمع منش

اما عن الاسس منزمان هي موجودة بس احاول اني ارسخها بالتطبيق و على فكرة خيوو هي 4 سنوات مو 5

تسلمون اخواني و مشكورين

اختكم
الكلمةالمنسية

وعليكم السلام ورحمة الله وبركاته ،،

بالتوفيق ا ن شاء الله ..

وعليكم السلام والإكرام ..

بالعكس خيو ما سوينا شئ .. هذا أقل القليل ..

إن شاء الله يكون معدلش A مو بس هالماده .. وبالتوفيق يا رب

ومعذره على الخطأ الكبير .. زيدناش سنه بالخطأ .. عموما .. غمضي وفتحي وبتشوفين روحش متخرجه ان شاء الله ..

بالتوفيق يا رب

اختك .. احساس

الله يسمع منش محتاجين دعواتكم
و خصوصا في اول كورس

كل الناس يقولون غمضي و فتحي ، بس ما تدرين شنو يصير في هالتغميضة

هههههههههههه اي بعدين تكبريني سنة هههههههههههههههه

مشكورة خيوو

الكلمةالمنسية

زين تسوون فيني جدي

مو نفس المدرسين اهئ اهئ

الفيز الوحيد اللي طلع نفس الشي
الكيم وحدة اسمها جميلة المطاوعة بس مسكينة شكلها زينة
الانج وحدة شكلها سودانية او اثيوبية ما ادري بس اسمها نادية و بعد شكلها طيبة وحليوة>>>>> لانها ما عطتنا شي اليوم
و الكالكولاس هذا اللي بيذبحنا وبيكسر اياديننا (ما في و لا ثانية تمر من غير كتابة و تاليها في الاخر يقو تونا في البداية و بعدين بنمشي اسرع شوي ..... اسمه مهند شهوان فلسطيني >>>> هو قال شي عن التغيير الظاهر انه غيروه في اخر يوم
اما عن الكمبيوتر CSC فحدث و لا حرج الله يستر شلون بنمشي وياه لانه يقول مصطلحات اول مرة نعرفها وقاعدين نفس الهبلان اسال البنات فهمتون شي الا يقولون و لا كلمة هذا اني اشوة منهم شوي فهمت >>>> و هذا اسمه تيسير ما ادري شنو

بييييييييييييييييييي الله يستر جان ما ما افلح في هالكورس
شكله حده احباط

عاد اسالو ليي عنهم اذا قدرتون
ابغي شوي ترتفع معنوياتي

الكلمة المنسية

الله يساعدكم اختي ... وهذا الشي يحدث غالبا في الجامعه خصوصا في السنوات الاولى من التخصص .. فالدكاترة يتغيرون !!









للأسف اختي ما اعرف ولا واحد من اله ذكرتينهم .. عدى تيسير .. هو ما درسني بس اتذكر كنت اروح اليه غالبا اسئله لأن دكتورنا كان ما يفهم شي .. وكنت افهم اليه ... ما ادري احسه جيد ..

اختي مادة CSC عليش تعتمدين بعد على الكتاب بصورة كبيره ... فبعد كل محاضره اقرأي الموضوع في الكتاب لأنه فيه شرح لكل المصطلحات .. وراح يسهل عليش واجد ..

خصوصا ان طبيعه TEST 1 في هالماده يكون هناك جانب من الحفظ .. كأسئلة عدد او مصطلحات .. فحتى يكون الامر عليش سهل اقرأي الكتاب اول بأول ..





لا يا اختي ... هذا الشعور طبيعي ... وغالبية الطلبه جدي يحسون في البداية لأنهم للحين ما تعودوا على جو الجامعه .. وانا من ضمنهم فكنت خايف في بداية الايام ما اسوي زين ... لكن مع الايام تكون الامور جدا عاديه ...
اهم شي يا اختي تثقين بقدراتش .. وراجعي وسوي اله عليش ... في الاخير الله بوفقكم ..

السلام



اي و هذا الوقعة انه لازم اتعلم الاساسيات اولا في الكمبيوتر واني ناسية كل شي خوك اذا عندك موقع مبسط شوي عن الاساسيات اقدر ادخله اتعلم منه شوي عشان افهم
و هو عالعموم للحين ما ادري من وين اشتري الكتب
لانه البوك شوب في الجمعة اولا كانه مقصف و ثانيا مافيه الكتب اليوم رحت شفت



ان شاء الله ............. اجمعين
الكلمة المنسية

وعليكم السلام ...


مواقع تتعلق بـ CSC100 ما عندي ... عندي مال CSC101


لكن عندي موقع فيه تمارين الى مادة الكالكولاس وفيه مسائل واجد تقدرين تحلينهم في الموقع .

http://cow.math.temple.edu/~cow/cgi-bin/manager

شكرا اخوي حزب الله ما تقصر

تعبناك ويانا (:

سيفت الموقع وان شاء الله استفيد منه
اما عن الCSC عادي اي شي المهم افهم منه شنوالدكتور قاعد يقول
لانه يقول انه احنا بنستخدم كتاب عن لغة الـ C++ في الكمبيوتر

و مرة ثانية مشكوووووووووور و تعبناك ويانا

الكلمة المنسية

عفوا أختي ولا شكر على واجب ..

CSC ثاني !! ما اعتقد في الهندسه فيه مقرر ثاني تدرسونه ! بس مقرر واحد .. يجوز يفكركم طلبة علوم حاسوب

اهلا اخيتي .. شخبارش ؟؟ وشخبار الدراسه وياش ..

خيو .. لا تنزعجين ولا يجيش احباط ولا شئ .. مثل ما قال لش الأخ حزب الله .. تغيير الدكاتره عادي في جامعة البحرين .. توقعيه يصيدش في اي كورس .. خصوصا في اول 3 سنوات ..

بقول لش قصه اواسيش .. >>> وحده الله يستر عليها >>> إن شاء الله بس عرفتينها

مره سوت روحها سوبر ومن .. وقالت بتاخذ 6 مواد .. كان في السنوات الأخيره يمكن سنه رابعه .. المرشد : يا فلانه مو زين بينزل معدلش .. حرام تخربين على روحش .. وهي أبدا .. لا حياة لمن تنادي ..

كنت ماخذه مادتين سهلين تقريبا .. مادة الفرنسي .. والاخرى مادة هندسه اسمها CAD بالإضافه الى اربع مواد دسمه ..
بس في داخل نفسي .. كنت اقول باخذ هالمواد وان شاء الله اذا فيها خير لي تتيسر ..

تخيلي ..

اول يوم دوام .. رايحه مستانسه .. مباشره على كلاس الكاد .. الا ما في احد انتظرت ثلث ساعه .. ولا طالب .. ولا دكتور .. ولا شئ !!؟؟!؟!؟

بعدين شفت بنيه .. واني اسولف معاها .. اكتشفت ان الكلاس حذفوووه ؟؟!؟؟! واني ما ادري بالدنيا .. ولا احد خبرني .. ولا احد اتصل لي .. ولا شئ ؟!!!

مباشره رحت التسجيل اتأكد .. وطلع صدق .. طيب ليش ما تخبرون ؟؟! ليش ما تتصلون وتقولون

يقولون لش لازم القسم يخبرونكم ..

طبعا اني ما خليتهم اتفلسفت عليهم .. وقلت لهم تشيلون الفرنسي .. وتخلون لي ماده ثانيه .. ورتبت الجدول على كيف كيفي ..

وتوته توته .. خلصت الحتوته ..

فعادي خيو .. كل الاحتمالات خليها .. بس لا تتضايقين ..

بالنسبه للدكاتره خيو .. نصيحه اخذيها من اخت مجربه .. صحيح .. سجلي عند دكاتره زينين .. وحاولي تحضرين عدهم .. بس لا تعتمدين عليهم اعتماد كلي .. وتحددين نتيجتش او مستواش بهم ..

كوني واثقه من قدراتش .. حتى لو كان الدكتور مو زين .. وابحثي عن المعلومه الى ان تصلين اليها .. وفي الاخير انتين المستفيده الأولى والاخيره ..

بعدين وينهو ( حزب الله )

دكتور تيسير جيد ؟؟!؟ وكنت تروح تسأله ..

هذا درسني CS100 .. اني ما ابي اخوفش خيو .. بس على ايامي .. القرون الوسطى .. كان مأساه حتى اني كنت اسميه تعسير .. ما كان يشرح .. ولما نسأله سؤال من التتوريال اللي يعطينا هو اياها .. ما يعرف يحله .. يقعد طول الحصه يقرأ فيه ويتهجى .. يمكن الان تغير .. وصار تمام .. الله العالم ..

بس الحمد لله .. جبت مع كل هذا عنده A- لاني كنت احضر عن دكتوره لمياء .. واسأل بعض البنات في اللي ما افهمه ..

عموما .. كلامي هذا قبل 5 سنوات تقريبا .. واللغه البرمجيه كانت باسكال .. الان يدرسونكم C+ كأن ؟!

تمنياتي لك بكل التوفيق .. دمت بخير وسلام

احساس

مو كأنه فيه احد يناديني ! لو يتهيأ لي !


اهاا .. اختي ( احساس ) ... انا موجود






اختي .. يجوز لما تسمعي مشكلة ( حزب الله ) .. تكون أهون من مشكلتكم مع الدكتور ..

اله درسني اسمه ( ماجد فهمي ) .. كان كل محاضرة يجي ويتكلم عن نفسه وبطولاته والطلبة الماستر اله تخرجوا على ايده .. واسمه العالمي اله ما يعرفون الا به !! والوقت يمشي علينا واحنا مو فاهمين شي !

حتى اتذكر احدى الطالبات سألته سؤال وللحين اتذكره .

- وهو نكتب برنامج بالباسكال يرسم الينا شكل مثلث بواسطه علامه النجمه ([color=#FF0000] * ) .
وقعدنا طيلة المحاضرة وهو يطالعنا ويطالع الكتاب ... تدرين في الاخير ويش قال ؟

قال : انا شرحته اليكم في النووت .. ارجعوا اليه ..

مع ان النوت خلص الفصل وبدون ما أبالغ عليكم .. عدد الصحفات اله كتبتها ما تتجاوز 10 صفحات !!

من القهر شققتهم واتذكر كتبت محل الجزء اله مخصصنه الى CSC خليته الى الكالكولاس ..


فكنت اروح ساعات الى تيسر كونه هو الوحيد اله احصله في اوقات فراغي ... فاروح اليه اسئله عن بعض المسائل اله شفتهم في بعض الاختبارات واله تتعلق بالمنهج وهو يشرح لي ويحل .. ويعني افهم الي بشكل بسيط جدا افضل من ماجد فهمي ..
فيجوز هو ( تعسير ) مو زين . لكن هو باشا على ( ماجد فهي ) ...

فطريقة ماجد فهمي كله شفافيات وكله قراءه من دون امثلة !!

والحمدالله ... تحركت على روحي من بعد TEST 1 .. كنت اتذكر الدرجه كانت متوسطه !! فتعرفت على احد الطلبة تخصصهم CS .. اله كنت اشوفه دائما يدرس طلبه ! فرحت اليه اسئله وفهمت اليه ... الى جانب بعد لحد ما مللت اختي وشبعت طنازة منها لأني كنت مو فاهم الاساسيات ... وفي الاخير طلعت بـ B+

يعني جذي .. على قولتهم ( الأعور على العميان باشا )

وبعدين هالمثال اللي سألت عنه البنيه .. اني بعد .. اتذكر في ايام مراجعتي لواحد من التستات .. اصييييح مو عارفه شلون يسووونه .. وعادة يجيبونه في الامتحانات .. اقول هالنجوم تلعب علينا .. مو عارفين حتى نسويها ..

وبعدين .. وش هالخوات اللي يذلون ذل على المعلومه >>> اختك مثلك

ذكرتني بشغله .. ساعات في ايام المراجعه لما اروح لاخويي حجرته .. يكون يراجع .. يعني اكون ماخذه فاصل اعلاني .. اقول له .. فلان .. تعرف كيف توصل الدائره الكهربيه مثلا ؟؟ هو بحسن نيه .. يقول كيف ؟؟!!

وتبدأ الاستاذه بالشرح المطول والمفصل .. اطلع اللي في جبدي كلللله .. وهو : بارك الله فيش .. احسنتين .. >>> افهميها على الطاير .. فكينا ..

هذلين الخوات .. وش تبون اكثر من جذي ..

دمتم بخير

اي صحيح دائما يكررون هالسؤال ... واتذكر شرحه لي احد طلبة السي اس ... واتذكر علمني طريقه لأي شكل كنت ابغيه ..
يا زعم بعدين قمت اتفنن بالاشكال





لا مو مثلها .. الظاهر الاخوات كلهم جدي





طريقة زينه .. وفعاله .. واتذكر استفدت منها .. لكن تدرين متى ؟

منذ يوم كنت في المرحلة الابتدائية ..

اذكر لما يرجع الوالد من الشغل مباشرة اروح اليه واسأله بس اقول اليه سؤالي بطريقة غير مباشرة .. لأن اكيد ما راح يعطيني وجه توه راجع من الشغل !! فكنت احفظ السؤال شفويا واقول اليه السؤال كاستفسار عادي كسالفة اقولها اليه .. ولما يجاوب اروح الى كتابي اكتبه حتى لا انساه





لا خلنا على الاخوان احسن ... متعاونين اكثر


وفقكم الله جميعا ..

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

وش هالوقعة اللي صايرة

الصراحة الله يبعدنا عن جدي دكاترة
و الله يستر من استاذ تعسير

هو بصراحة يكتب على اللوح و يشرح و لا كانه يشرح لاحد
كانه يراجع لروحه
و احنااااا ضايعين في الطوشة و لا ندري بشي

بس بصراحة اني افهم شوي عليه
يعني تحويل الارقام من سيتيم الى ثاني كان سهل لانه بسطه لنا
بس شوي عندي صعوبة في التحويل من الـBINARY الى HIX-Desemel
هذا لحد الحين ..........يعني توها الناس على الصعب جاي في الطريق



لا خيوو وين عندهم وقت هبابهم على الاتصالات لنسوانهم و رجالهم و اصدقائهم

عجل وين صارت انه المفتاح مال الخزانة ناخذه من مكان
و نروح نسلم الرسوم في مكان
لا و لو قريب قلنا ما عليه الا واحد في شرق و الثاني غرب



ما شاء الله يعني اقدر اقول انه دكتورة لمياء OK لو نص اي و نص من مجهودش




وانتم كذلك خيوو




هههههههههههههه خوك صدق الظاهر انه الاعور على العميان باشا



لا .......... امبلا ....... احيانا مو دائما يعني ساعات نتفلسف و ساعات ما ليننا زاغر و لا كلمة




قول اضمن مو احسن

وانتم كذلك اخي الكريم

دم دد دم دد دم دم دمتم سالمين >>>>> تطالعون الكركتير

و مشكورين على الطرائف و الحركات مالت الدكاترة

ويش اخبار االجامعه لدى الطلبة الجدد ؟؟

ان شاء الله خير ؟؟

السلام عليكم

مشكور خوك على السؤال و ما تقصر ؟

الظاهر حاس شنو قاعد يصير فيننا



الخير بوجهك
بس من وين يجي الخير و احنا على هالدكاترة



و الله خوك لا تفتح الجروح
توني امس نص ساعة على التلفون بس اشرح الحال ... و بعد ما كملت القهر اللي فيني

ببدي لك بالاحسن

انج: نادية
ما فيهاعليها في الهدرة ويا الطلبة والطالبات و مسكينة مجننتنها من زود ما اتكلم في المحاضرة واعترض على اشياء واجد
( و يوم اللي ما اتكلم فيه البنات يقولون ليي هدرتش ليها وحشة اليوم)
بس بصراحةحليوة في التعامل مع الطلبة و شرحها اوكي

الكالكولاس : مهند شهوان : يقسم المحاضرة 3 اقسام
1 الشرح يكون بطيء وعلى راحة
2 يزداد الشرح في السرعة
3 بعدين ما نفهم شي من اللي يحله
لا بس مسكين يعني نذبحة من الاسالة و هو ما يقصر مطول باله علينا

الكيم : جميلة ..... ( ما اعرف الاسم الثاني)
شرح المادة الكيميائية اوكي بسسسسسسسس
تعالو لها في مسالة من المسائل الرياضية
احنا بصراحة كل واحد في وادي و كل واحد يسال الثاني شنوهذا.... موداري وين الله قاطة>>> واني طبعا شيختهم في هالسالفة ... مساكين بعض البنات يواصلون وياها في العمليات الحسابية بس مودارين شنوالسالفة

الCSC : تعسير اوه قصدي تيسير
حدث و لا حرج .... في محاضرته ما في احد مو مبطل بوزه شبرين
تقعد في المحاضرة كعدم وجودك (يعني بالعربي بس تسجيل حضور و لو تاخذه ذاتي وما تجي احسن بعد)
لا احد يفكر يروح يساله سؤال لانه مبرمج على عبارات معينة اذا تساله سؤال يرد يعيد عليك الكلمات نفسها اللي في الشرح و بنفس الترتيب

واخيرا و ما ادراك ما هواخيرا
>
>
>
>
>
فيز : يا زعم عنده شهادة الدكتوراه ((( رضا بنائي ))) اشهر من نار على علم
هو بنفسه يعترف انه سمعته سيئة في الجامعة وكل يوم يطلع لنا شي يقول انه هوالسبب فيها
بكل صراحة و بدون لف و لا دوران لو ما كانت عنده شهادة الدكتوراة جان قلت هذا جاهل (لانه الواحد المفروض تكون عنده دكتوراه في الاخلاق قبل العلم)
لانه اللي يحط باله و بال الطلبة و يعتقد انهم ما يقدرون يتفوقون عليه و يتحداهم و تعامله مع الطلبة سواء كانو بنات او صبيان يكون بنفس طريقته مع التعامل مع الحيـو....
اللي يكون جدي شنوبينقال عنه غير كلمة جاهل

الليسنر لوما اروحه عند سيد عدنان جان برسب في المادة
و لاحظت الفرق الشاسع بينه وبين سيد عدنان (180 درجة)
في التعامل مع الطلبة في طريقة الشرح في ايصال المعلومة للطالب

مااقدر اتكلم ازيد خلاص لاني بنفجر


ادري هدرت وااااااااااااااااااااااااجد بس كل هذا من القهر
هذا للحين ما شفت شي في الجامعة و جدي قاعدة اكتب هذا لو مرت سنة وش بيصير


مشكورين على قرائة الرد لانه ادري انتفخ راسكم
روحو ابلعو حبتين بندول

بالعافية على الفطور
يلا مع السلامة


سلملم
الكلمة المنسية

وعليكم السلام ورحمة الله وبركاته ،،



يمكن أختي تقصدين د. جميلة المطاوعة
لأن هذي هي اللي علمتني .. شرح المادة الكيميائية أوكي ..
وحتى في المسائل تمام .. بس اتذكر مو هي الا تحسب .. تخلي الطلبة هم اللي يحسبون .. بس بعض الأحيان تشيّر ..





الله يساعدكم عليه !
وانتظروا المفاجآت من عنده أكثر بعد ..

أستاذ سيد عدنان .. مع ان ما عنده دكتوراه .. بس هو رجال محترم ومتواضع .. وشرحه وااجد زين على حسب الكلام اللي اسمعه من الطلبة اللي يحضرون معاه .. سمعت يقولون انه في فيز 102 أخطر من 101 .. يعني اذا تقدرون تنزلون معاه واجد زين .. يعني اللي يشوف شرحه يقول هذا دكتور ما شاء الله عليه ..






يمكن تكتبين مجلدات

اي هذي هي
تخليننا احنا اللي نطلع النتايج و احنا اصلا ما ندري في شنو تشتغل
يعني اني اليوم توني عارفة ابسط طريقة لاخراج المواد الغير متفاعلة (يعني الطريقةالبدائية مالت الجمع و الطرح من مجموع المتفاعلات) بس الله وكيلك في محاضرات تمر عليننا و احنا زي الاطرش في الزفة... اطلع من المحاضرة نفس ما دخلت لانه طول المحاضرة على قولتك مشيرة على مسالة من البداية الى النهاية





يعني في ازيد من هذا

و بصراحة توني ادري ان د. سيد عدنان ما عنده دكتوراه
و صح نفس ما قلت فيه من جميع النواحي حتى مرشد اجتماعي يصلح لانه يقعد ينصح الطلبة على ما يجون الباقي يعني ما يضيع و لا ثانية بدون ما يستغلها احسن استغلال .. صدق ما شاء الله عليه



هذي المجلدات بس الفهرس عشان تدورون المواضيع في الموسوعات
هههههههههههه

لا صدق اني هرارة واجد واحب احلل حتى الاشياء الصغيرة من جدي كنت بدش علم نفس >>> بس خسارة صكوه

يلا تصبحون على خير

الكلمةالمنسية

السلام عليكم ورحمة الله وبركاته ..


يعجز اللسان والكيبورد وكل الحواس الخمس عن وصف هذا الانسان .. البناءي ..



نصحية لك ..


اكثري من حل التمارين من الامتحانات السابقة .. وان شاء الله بتمر هذه المرحلة على خير ..

هههههههههههههههههه
مشكور على الرد و صدقت فيما قلت



شكلي لازم اسوي جدي
و هوالحين عاطننا اسألة امتحانات
بحاول احلهم

مشكور

وعليكم السلام ورحمة الله وبركاته .


عفوا اختي .. ونتمنى لكم التوفيق ان شاء الله في حياتكم الجامعيه

طبعا المعاناة لابد منها في الحياة الجامعيه خصوصا في البحرين .. فحتى نشعر بطعم الراحه لازم نتذوق التعب شوي صح ؟ ...






ساعدكم الله اختي وان شاء الله الفصول القادمه تحصلين دكاتره زينين ..



الله يوفقكم اختي في موادكم .. وأنصحكِ اختي تحصلين اليش مجموعه من الاختبارات السابقه لمادة الكيم .. لأنها راح تفيدش واااجد في الامتحانات .. وحليهم بروحش .






الله يساعدكم .. والحمدالله الله وفقكم بالاستاذ السيد عدنان .. وهو فعلا أستاذ متمكن .. درسني في المختبر .. وهو أفضل من اغلب الدكاترة الموجودين في قسم الفيزياء حقيقة .. وهو من أحد المظلومين في القسم . للأسف !!






معذوره اختي ولو حتى طولتي في الرد .. والله يسهل عليكم ان شاء الله اختي

وان شاء الله .. راح تحصدين ثمار جهودكِ في نهاية هذا الفصل .. واذا احتجتم لأي استفسار او مساعده يمكنكم اختي طرحه في هذه الواحه وان شاء الله راح تجدين الجميع يهب لمساعدتكم .

الله يعافيكم .. بعد باقي على الفطور 4 ساعات

الله يسلمكم .. ومسامحه لتأخري في الرد .. الله يغربل بتلكو